Wednesday, July 22, 2015

Ang alamat ng tatlong brownout

May isang babae na tatlong beses nagkaroon ng mangingibig. Marami, kaunti -- sinong magsasabi? Ano nga ba ang batayan? 

Taling tali sa pagkawala ng kuryente and kwento ng tatlong lalaking ito. Sa tatlong hiwa-hiwalay na pagkakataon, namatay ang mga ilaw sa unang araw ng kanilang pagkakakilala. 

Batang bata pa ang babae noong makilala nya si Juan. Nautusan ito ng kanilang guro na sadyain ang kanilang bahay. Kulang sila sa tauhan para sa isang relihiyosong pagtatanghal. 

Nagkakabisa sila ng mga linya sa simbahan nang mamatay ang mga ilaw. Umalingawngaw ang mga tinig nila sa loob ng kapilya. Ilang oras bago bumalik ang ilaw -- uso ang brownout noon.

Si Pedro naman, isang lalaking puno ng ambisyon. Magkasama silang tumungo sa isang lugar kung saan nila kakausapin ang ilang mamamayan -- mangangako at makikiusap, magtatanong at magpapaliwanag. 

Di nagtagal ang salitaan ng gabing iyon sa probinsya. Naputol ang linya ng mikropono. Walang-walang makita sa paligid ng mga mesa. Sa totoo, nakakatakot. 

At si Jose, matangkad, malalim ang tinig, paniwalang paniwalang kay husay husay nya. Malamig ang silid pulungan nang mamatay ang mga ilaw -- biro nya, “hindi ako nangangagat!” 

Hindi nga nangangagat. Pumapatay naman sa sama ng loob. 

Di na alam ng babae kung ano na ang lagay ng tatlo ngayon. Nagsunod sunod din yata ang mga patay-ilaw sa buhay nila. Ang alam lang nya, kaniya kaniya sila ng hamon at aral na ibingay sa kanya. Kanya kanya silang iniwan na marka. Pamilya. Bokasyon. Pahalaga sa sarili.

Alaala.


Sabi ng matatanda, tatluhan daw ang pasok ng mabubuti o masasamang bagay sa buhay natin. Kaya pwede nang ikwento ang alamat. 

Tapos na ang sumpa ng tatlong brownout. Sindihan na ang mga pailaw. 

No comments: